Halloween party ideas 2015




انتي ماما جديدة ؟

مبروك وإن شاء الله انتي قدها 

في البداية كده يا مامي لو والدة في البيت لازم نعرض البيبي على طبيب أطفال يبص عليه كده مبدئيا ويطمنك

ولو والدة في مستشفى لازم تتأكدي إن طبيب الأطفال بص على البيبي مش طبيب النسا ( مع كل الاحترام لدكاترة النسا طبعا)

أول مشكلة تقابلك هي بداية الرضاعة

 تجربة جديدة بالنسبالك بس كله هيبقى تمام فوائد الرضاعة الطبيعية
بيكون فيه ألم بالثدي في البداية بس الأمور بتتحسن تدريجيا كل ماالبيبي يرضع أكثر وتتعودي عليه
الرضاعة الليلية ممكن تسبب لك إزعاج لأن البيبي يصحى بالليل أكثر من النهار خاصة أول تلات شهور 
ولكن الرضاعة بالليل دي مفيدة جدا ليكي لأن كل ما ترضعي بالليل هرمون البرولاكتين بيعلى عندك وده الهرمون المسئول عن إنتاج اللبن وبالتالي اللبن بيزيد 

ثاني مشكلة هي البكاء 

البيبي بيعيط من ايه ؟ 
ممكن جعان ، عطشان ، زهقان ( اه ماهو بيحب يلعب مش كل الوقت نوم) ، او قرفان ( عايز يغير البامبرز)
انتي ماما شطورة جدا مع الوقت هتعرفي هو عايز ايه من نغمة العياط أيوة بجد 
طيب لو معرفتيش  ؟ هندور على كل الأسباب اللي فاتت 
طيب لو لسه بيعيط برضو ؟ اه كده ممكن يكون مغص 
أيوة عطوني في المستشفى دوا مغص اديهوله يا دكتورة ؟ لا استني 
الأول بنوقف البيبي على كتفك كده ونخبطله شوية على ظهره باستخدام راحة اليد لحد لما يتكرع
او تحطي إيدك على بطنه تسنديه وتنيميه على بطنه شوية مع الخطبة البسيطة على ظهره باستخدام راحة اليد لحد لما يهدى 
ب تعملي تمرين لرجله ناحية بطنه كده كذا مرة برضو لحد ما يرتاح 
لو غلبتي بقى في الحالة دي نستخدم دوا المغص وده مهم انك مش تستخدميه عمال على بطال. 

ثالث مشكلة هي الترجيع

البيبي كل شوية يرجع يع 
ممكن تكوني بترضعي زيادة يا مامي نظمي ميعاد الرضعات كل ساعتين أو كل تلات ساعات على حسب حاجة طفلك ومش كل لما يعيط ترضعيه زي ما قولنا في أسباب تانية دوري عليها
الارتجاع مشكلة شائعة في الأطفال تحت سن 6 شهور وسببها ضعف العضلة اللي بتقفل المعدة وبالتالي بتفضل المعدة مفتوحة على المريء وده بيسبب ارتجاع الرضعة وتطلع لفوق تاني .
الموضوع بيتحسن تدريجيا كل ما الطفل يكبر والعضلة تقوى ومعظم الأطفال بتختفي مشكلة الارتجاع عندهم بعد سن ال6 شهور.
طيب نتعامل ازاي مع الطفل ده ؟
أهم حاجة وضعية الطفل في الرضاعة 45 درجة على الأقل ولو يكون قاعد مسنود ب 90 درجة يكون أفضل
ماينمش بعد الرضعة على طول لا نوقفه شوية على الكتف لمدة من عشر دقائق ل تلت ساعة او لحد ما يتكرع
والرضعات تكون بكمية صغيرة ومتقطعة 
وممكن نستخدم دواء مضاد القيء تحت إشراف الطبيب.

تابعي الأجزاء الأخرى من سلسلة معلومات مفيدة لماما جديدة 


بقلم د. نعمة سعيد 

أخصائي طب الأطفال 




إرسال تعليق

يتم التشغيل بواسطة Blogger.