Halloween party ideas 2015



هنكمل كلامنا يا أحلى مامي 
رابعا
الإخراج عند الطفل 
بالنسبة للبول المفروض نغير البامبرز كل 6 ساعات على الأقل سواء كان مليان او فاضي وده علشان نتجنب الإصابة بالتهاب الحفاض وطبعا بندهن كريم مخصوص للبيبي مع كل غيار للمحافظة على جلد الطفل 
أما البراز طبعا اول براز للطفل بيمر خلال ال24 ساعة الأولى من الولادة وبيكون لونه أسود 
بعد كده الطفل بينتظم في إخراج البراز ، في طفل بيعمل كل ثلاثة أيام وفي طفل بيعمل كل ما يرضع 
الحالتين طبيعيين وممكن يوصل عدد مرات البراز إلى 8 مرات في اليوم ويكون الطفل طبيعي جدا
البيبي اللي بيرضع طبيعي برازه لونه أصفر ذهبي وريحته مقبولة جدا 
أما الطفل اللي بياخد رضاعة لبن صناعي ممكن يكون البراز مختلف شوية 
امتى أقلق كأم ؟
البيبي مش بيعمل بول طول اليوم لازم استشير الطبيب فورا للاطمئنان على الكلية
البيبي ماعملش البراز الأسود بعد مرور 24 ساعة لازم استشير طبيب للاطمئنان على وجود فتحة الشرج 
البيبي مش بيعمل براز بقاله أكثر من تلات أيام مع وجود انتفاخ ب البطن لازم استشير الطبيب لاستبعاد أمراض القولون 
من فضلك لا تستخدمي لبوس الجليسرين للطفل إلا اذا وصفه الطبيب لأن كثرة استخدام اللبوس سيجعل الطفل يتعود على عمل البراز فقط مع اللبوس ولا يعمله بدونه

خامسا 

البيبي ينام فين وازاي ؟

أفضل وضعية نوم للطفل الأقل من سنة هو النوم على الظهر علشان يتنفس كويس 
والأفضل في سرير منفصل ولكن بالقرب من الام لأن لو نام جنب حد ممكن الشخص ده يتقلب فوقيه ويمنع الطفل من التنفس ويموته وفي حالات فعلا حصل معاها كده فلازم ناخد بالنا
في الأول الطفل بينام معظم اليوم أكثر من 14 ساعة في اليوم للاطفال اقل من تلاتة شهور ثم تقل عدد ساعات النوم تدريجيا حتى سن السنة لتصل إلى 9 ساعات فقط .
النوم مهم للاطفال لأن أثناء النوم يزيد إفراز هرمون النمو عند الطفل فيساعده على النمو بصورة أسرع
لو عايزة نومه ينتظم في وقت معين بتعوديه على روتين ما قبل النوم مثلا استحمام بمية دافئة وشوية هدهدة او أغنية لطيفة او آيات من القرآن المهم مع الوقت هيفهم الطفل ان أول ما يعمل الروتين ده معناه نوم فينام بسهولة بعدها
محاولة انتظام النوم طبعا مش قبل سن 4 شهور لأن زي ماتفقنا ب يصحى بالليل علشان الرضاعة في الأول وده مهم جدا

سادسا 

البيبي يلبس ايه ؟

الطفل بيشعر بالحر وبالبرد زينا بالظبط 
لو احنا في الشتا بنلبسه طبقات قطنية ملامسة لجسمه وبعدين أي حاجة بتدفي من فوق بس مانبالغش في عدد طبقات الهدوم لأن ده ممكن يؤثر على التنفس 
لو في الصيف بنلبس الطفل هدوم خفيفة عادي 
اللي اهم من نوع اللبس هو أن احنا ناخد بالنا من تغير حرارة المكان اللي الطفل فيه يعني مايكونش متدفي وفجأة نعرضه لتيار هواء او نطلع من غرفة لغرفة فرق الحرارة بينهما كبير بسبب تكييف مثلا 
لو هنشغل تكييف وفيه بيبي في البيت  يبقى نظبط حرارة في حدود 25 الى 27 درجة لتلطيف الجو مش لتبريده
والاستحمام في الشتا عادي طالما هقفل منافذ الهواء وهلبسه نفس عدد طبقات الهدوم اللي قلعها 

تابعوني في سلسلة معلومات مفيدة لماما جديدة في الأجزاء القادمة 

الجزء الأول

بقلم د.نعمة سعيد 

أخصائي طب الأطفال

إرسال تعليق

يتم التشغيل بواسطة Blogger.